Cors de guitarra e vriulon per internèt o cap a cap

Vajuda a Gent en Belgica en 1973,  qu’estudii la guitarra classica entre 6 ans e 18 ans a l’Escòla Nacionau de Musica de Flandres. A 14 ans, que’m crompi la prumèra guitarra electrica. E autanlèu, que balhi cors de guitarra a escolans de collègi e de licèu.

 

A 20 ans, que me’n vau de Belgica a bicicleta dab Matthew Watkins e dab eth, qu’apitam en 1995,  lo duò « Ail Fionn » (Saz/Mandolina) en Irlanda. La nosta musica qu’ei inspirada per las musicas tradicionaus mescladas dab improvisacions. Mès, pro viste, que vam escambiar las nostas bicicletas contra saumas e carretons. Amassas, que nos juntam au grop nomade « Dongas Dance Band » en Cornoalhas (R.U)

 

En 2000, qu’arribi en França, en Bretanha, çò qui ei lo parat d’escambis culturaus e musicaus. 

Dinc a 2003, que’m passeji en França, de cap vath a cap sús, en tot hèr animacions musicaus dab l’associacion Bechamèl dens las escòlas, maisons tà handicapats e maisons de retrèita.

 

A petits drins, dab hestaus, concèrts, passa-carrèras, estanquets, partatges musicaus e autas ocasions d’encontres e d’escambis, qu’èi aprés l’acordeon, la mandolina e la clarineta. Lo gost deu vriulon, que m’ei estat balhat per un encontre dab lo grop russe Dobranotch.

 

Arribada dens las Pireneas en 2003, que m’estanqui dens las Hautas Pireneas e aquiu que comenci la mia carrièra de professor de musica, entre autes, a l’ADAC (Associacion de Desvolopament de las Arts en Comenge), a l’escòla de musica d’Arnè e tanben a l’escòla de musica de Sent Laurenç de Nèsta. Dempuish, ua màger part de la mia vita qu’ei consacrada a balhar cors de guitarra (classica, acoustica e electrica ..) vriulon e acordeon a escolans de qui an entre 6 et 99 ans.

 

En 2004, que seguishi ua formacion en musicòterapia dab l’AMBX (5) de Bordèu. En 2005, que’m junti au grop « Los vriulons de Garona » e que descobrishi la musica occitana e lo plaser de jogar a 14 vriulons !

En 2006, qu’apiti lo grop « Youshka », un triò de hemnas dab Inge Van Rompaey Maria Hulsens e Dona Bastin.

L’associacion Léz’arpèges qu’ei vajuda en aqueras e qu’organiza eveniments a l’entorn de la musica occitana, per exemple los « Ça Tend Bal ». Que i animi talhèrs de musica tà musicaires de tot nivèu, atge o instrument. Que son eths de qui jògan tà obrir lo bal deu ser.

Que monti tres espèctacles musicaus entà mainats dab Veronica Piat, plasticiana, fondatora de l’associacion « Creagire ».

Entre 2005 e 2010, que seguishi mantuas formacions au Conservatòri de Tarba :

- ua formacion tà las musicas actuaus e improvisadas dab iniciacion au « soundpainting » (Pèir Dayraud) : que formam, en seguir, lo grop « Maximal Orchestra ».

- que despenji lo diplòme de fin d’estudis de 2au cicle en guitarra classica, (Danis Abbate)

- que despenji lo prumèr prèmi en musica tradicionau (vriulon), pòrta d’entrada entau Diplòme d’Estat devath la direccion de Pascau Caumont e Xavièr Vidal.

 

Que sòi tanben intervenenta agreada tà la transmission de la cultura occitana (cant, musica e dança ..) dens las escòlas mairanas e primàrias.

Uei lo dia, qu’acabi la validacion deu Diplòme d’Estat en musica tradicionau occitana (vriulon) a l’ISDAT (Institut Superior de las Arts de Tolosa) e que formi lo Duo Inge Sylvain.

 

Après annadas d’ensenhament en escòlas de musica, estatges, …qu’èi decidat de crear la mia pròpia escòla de musica « Musique à Fond ! »

 

Aquiu qu’i seràn balhats cors de :

- guitarra classica, acostica, e electrica dens los estilles ròc, blues, cançon francesa, varietats, fòlc, classic, fingerstyle, fingerpicking, improvisacion, compausicion segon la demanda e los gosts deus escolans.

-  vriulon dens los estilles de las musicas tradicionaus ( occitana, bretona, irlandesa, inglesa, klezmer  ..), ròc, classic, improvisacion e compausicion

- desvelh musicau entaus mainats a partir de 3 ans.

 

SIATZ TOTS LOS PLANVENGUTS